أحيانا نقابل في حياتنا العامه أشخاص يتميزون بروح الدعابة والمرح
وتصير الجلسه معاهم محببه للنفس بس تتمنى تسمع سوالفيهم ومقالبهم
وخاصة الأشخاص اللي احنا نسميهم بلفظنا العامي (( العيارين ))
ونلاقيهم لما يمزحون بأي طريقة كانت حتى لو مزح ثقيل ننبسط عليهم
لكن فيه أشخاص سبحان الله حتى لما يمزحوا تكون بطريقه غير مهضمومه
ويكون مزحهم بالفعل ثقيل وماله داعي وماتتقبل منهم ..
عموما ماطول عليكم واتركم مع هالموقفين .. وابي تقولون لنا وش رأيكم بهالنوع من
المزح ..
الموقف الأول :
مجموعة من الشباب كانوا رايحين لمكة وكان معاهم واحد عيار بالمره ويحب المزح والمقالب ..
المهم طلع ذاك اليوم من عند ربعه وهو نازل من الشقة ألا ويلاقي هالتكرونيه اللي
منسدحه على الرصيف ترضع ولدها ..
ألا وينط للسيارة ويروح يجيب كأس ثم أشر للتكرونيه ..ممكن شوي حليب ؟؟
ناظرته هالتكرونيه بعيونها الحمرا وهي حمقانه .. وقالت .. يلا روحي انتي ماتستحي يا
هماره ياهيوانه ..
الرجال صامل ولاهمه طلع خمسين ريال وقالها .. بعطيك خمسين ريال بس تملين الكاس
حليب
التكرونيه طاحت لهاتهاعند الدراهم ..
قالت .. شوف انتا يعطي انا مية يملى كلو كاس هليب .. عاد هالعيار ماصدق خبر
المهم رجع لربعه وقالهم .. يالربع لقيت واحد عند باب الحرم يبيع حليب يقول انه حليب
خلفات
وأنا ودي أشرب حليب خلفات وأعرف انكم تحبونه بس قلت اخاف انه غاشني
واخذت منه الكاس علشان تشوفون هو حليب خلفات ولا حليب قواطي
طمر واحد مافيه صبر وقال : هاته انا اللي اعرف حليب الخلفات
وكل واحد يقول عطني اذوقه وأنا اعلمك .. وتهاوشو علشان كلن يبي يشرب
المهم قال : يالربع كل واحد يشرب منه فنجال ونشوف
يوم خلصو قال وش رايكم
احد يقول حليب خلفات بس حالي يمكنها بكره ..واحد يقول لا انا ابخص تراه غاشه حاط
فيه سكر
يوم خلصوا لهم هاه اشرايكم نروح نشتري منه ؟؟؟؟
قالو لا بصراحه مايستاهل .. المهم حاول فيهم وحلف عليهم لين اقنعهم كلهم يروحون
معاه
راحو لين وداهم عند ألتكرونيه الاهي قاعدة ترضع ولدها في نفس المكان
قال لهم شباب ..تراكم كلكم أخوان عيال ألتكرونيه من الرضاعة !!
عاد كلهم انهبلو.. اللي زعل عليه واللي ضحك واللي قام يشتم فيه واللي يدخل اصبعه
بحلقه يبي يطلع هالحليب اللي شربه ..
الموقف ثاني
وحده من الحريم مشهوره بعيارتها ومزحها ..
مره من المرات كان عازمه صديقاتها .. ولما انتهت العزيمة وباقي شوي وتروح كل وحده لبيتها
جابت لهم بضاعة وقالت ..لهم شوفوا هذي مجموعة من الارواج مره تجنن جايبتها لكم
من برا
الميزه بهالروج انه له طعم مثل الفواكه ..
ابي كل وحدة تجرب وتحطها وتكشخ فيها قبل تروح لزوجها خبركم الرجاجيل يحبون
هالحركات ..
عاد هالحريم ضعيفات صدقوا وبدت كل وحدة تدهر بهالروج وتحطه على شفايفها وفعلاً
كان طعمه مثل طعم الفواكه
وهالحرمه العياره كانت تضحك وتقول يلا كل وحدة تروح لزوجها وتسأله وش رايه
وتقولي من بكره
طبعاً هالروج فيه فكره وهو انه بعد نص ساعه من وضعه على الشفاه يتحول من اللون
الأحمر الى اللون الأخضر ولايروح اللون الا بعد يوم حتى لو غسلته مايروح ابداً
طبعاً هالحريم لما وصلوا البيت اثاري كل وحدة صارت خشتها مثل خشة الضفدع ..
اللي انهبلوا عيالها يوم شافوها واللي انهبل زوجها وقام يهاووشها واللي ضحك
عليها ..
تقول هالحرمه وحدة منهم دقت علي وهي زعلانه من هالمزح الثقيل وتدعي علي تقول
إن زوجها هاوشها وقالها يالمخفه وش حركه هالبزارين اللي انتي مسويتها بنفسك
الشرهه مو عليك الشرهه على اللي مازحه مزح ماله داعي ..
وبعضهم دقت تضحك وتقول والله انبسطنا انا وزوجي وصار شكلي ذيك الليله تحفه ..
يعني سبحان الله بعض الناس يكون حساس من المزح مهما كان نوعه ولا يحب أحد
يمزح معاه او يسوي فيه مقلب .. ولازم فيه حدود بينه وبين اي شخص حاب يمزح معاه..
والبعض من الناس يتقبل اي مزح أو اي مقلب .. بس يكون بطريقه مهضمومه ومش
مؤذيه ..
فانتم من أي نوع .. يعني هل تتقبلون هالنوع من المزاح .. ولا تتنرفزون علطووول من
هالشخص حتى لو كان بحسن نية ؟؟؟؟
ودمتم بكل خير
موضوع: مزح ثقيل وماله دااعي ؟! 
السبت يونيو 07, 2008 11:48 pm
